أسئلة غبية ومالهاش حل

أسئلة غبية ومالهاش حل

مش كل الأسئلة ليها إجابات !

1-الكهرباء لما بتتقطع بتروح فين؟!

2-لو فيه شجرة وقعت على الارض فى الغابه، هل بقية الشجر هيضحكوا عليها؟

3-لما تطلب ساندوتش من مطعم وتحب تضيف عليه اى إضافة بيزودوا سعر الساندوتش، طيب ليه لما بتحب تشيل حاجه من محتويات الساندوتش سعره مابيقلش؟

4- ليه بيقولوا (الحب أعمى)، ومع ذلك كل أغاني الحب عن (العيون)، نور العين وسحر عينيك وعينيك واحشاني وعينيك كدابين وحبيبي وعينيه أصلاً؟!

طيب لو كان الحب اعمى .ليه واكلين دماغنا بالحب من اول نظرة؟

5-ليه اللي سايق عربية ومشغل الكاسيت أو الراديو.. أول ما يدخل شارع ضلمة يروح موطى الصوت فوراً؟!

6-ليه لمّا الواحد يكون واقف مستنى الأسانسير بعد ما داس على الزرار اللي بيستدعى الأسانسير وبقى منور وباين إنه منوّر، ييجي واحد تاني بعد ثواني يبص لك ويبص للزرار المنور ويروح دايس على الزرار تاني؟!

يعنى انت واقف طرطور يعنى ولا اية

7- لو كانت الأرض كرة – زى ما بيقولوا – طيب الماتش هيبدأ إمتى؟!

8- هل حصل فعلا فى يوم من الايام أن فيه واحد (ضرب عصفورين بحجر)؟

9-ليه لما تسأل واحد على العنوان وتقول له "شارع كذا فين؟!" يرد عليك بسؤال "هما قالوالك فين؟!". طيب ما هما لو كانوا قالوا لي ماكنتش سألتك ؟!

10-ليه لما حد يحب يدي معلومة بيبدأ الجملة بكلمة (بيقولك-قالوا-بيقولوا-قالك اية)، هما مين اللى بيقولوا دول،
نفسى اعرف؟!

11- ليه الواحد بيدوس على الريموت كنترول بقوة وعنف لما الحجارة بتشطّب ؟!

ميرسى لمروركم كلكم يا جماعة على الموضوع